Электронлă вулавăш

Темлерен, яла отпуска таврăнсан, инçех мар вырнаçнă катка-пичĕке тăвакан артеле çитрĕм. Хапхаран кĕнĕ çеçчĕ - тахçан пĕр урамра çапăçса ӳснĕ юлташăма тĕл пултăм.

- Эс, каптăрма ачи, мĕн туса çӳретĕн кунта? Мĕн çухатнă? - çатăлтатрĕ Павăл аллăма вăраххăн силлесе.

- Ракатка хăми кирлĕ пулчĕ, - терĕм эпĕ. - Аннене пахча карти тытса парасшăнччĕ.

- Халĕ Атнашкин патне ĕнтĕ. Çапла-и? - çăвартан пăхрĕ Павăл. - Ан кĕр ун патне.

- Ма? - тĕлĕнтĕм эпĕ.

- Малтан Мульхапа курса калаç.

- Ку тата кам?

- Шерккей Мульхи-и? О, Мульха пирĕншĕн турă та, патша та! Пурне те ывăç тупанĕ çинче ташлаттарать.

- Арăмĕ, штоль? - тавçăрасшăн пултăм эпĕ.

- Асту пуль. Еркĕнĕ! - йӳççĕн лĕхлетрĕ юлташăм.

- Нивушлĕ çав териех - влаç пайламаллах - юратать ăна Атнашкин?

- Хă, каларăн та! Мĕн юратмалли пур ăна, çав тислĕк купине? Урлăшĕпе тăршшĕ пĕр тан. Ни - кĕлетки, ни - сăнĕ-пуçĕ...

- Апла тăк, мĕнле çавăрса тытма пултарнă-ха вăл хуçалăх тилхепине?

- «Мĕнле» мар, «мĕнпе»! Ӳсĕрле-мĕнле «юсаса» янă та ăна пирĕн катăкки, ку вара, Мульхи, тĕлĕрсе тăман - хăпарса та ларнă ун ĕнси çине.

- Ара, ма кăларса çапмасть? Унашкал хĕрарăмпа...

- Хе, кăларса пăх-ха! Çав кунах Канаша, çӳллĕрех ларакансем патне, чавтарать. Варалать, ятне ярать: çапла-капла тет, арăмĕпе ачи-пăчи пур çĕртенех мана - ватă хĕре, тăлăх техничкăна - улталаса пурăнчĕ тет. Эсир вара çав аçа йытта пуçран шăлса ачашлатăр!

- Н-да, - ĕнсене хыçрăм эпĕ, - йывăр лару-тăру...

- Вăт, пурăнатпăр çапла, икĕ турра пуç çапса... Латнă, ку юрĕ-ха. Тĕп ыйту - сана пулăшасси! Акă мĕнле тăвăпăр, тăванăм. Эсĕ халь тӳрех, пĕр тăхтамасăр лавкканалла вĕçтер: пĕр çутă «кăвакалсăр» ĕç тухмасть кунта. Эп унччен Мульхана «хатĕрлĕп»: ачи хамăр çын, пулăшасчĕ ăна тейĕп. Пĕрер черкке ӳпĕнтерсен çемçелекенччĕ...

Çак самантра кантуртан пичĕке пек мăнтăр хĕрарăм кусса тухрĕ.

- Эс мĕн унта, Павăл, чĕлхӳне йӳле ярса тăратăн! Ĕç çук-им, халап çапнипех шалу килет тетĕн-им?

- Ĕçĕ-пуçĕ пур-ха, Ольга Христофоровна, ытлашшипех, - çемçен юхтарчĕ Микихвер ывăлĕ. - Ак Шупашкартан тус-пĕлĕшĕм килчĕ те, чылайранпа курман хыççăн перкелешсе илмелли тупăнчĕ...

Вĕсем калаçкаласа тăнă хушăра эпĕ апат-çимĕç магазинне ярăнтартăм. Каялла таврăннă чух Павăлпа Мульха мана крыльца çинче кĕтсе ларатчĕç.

- Персе те çитрĕн-и? - куçĕсене шуххăн ялкăштарчĕ юлташăм. - Ну, молодецă! Эпир те кунта Ольга Христофоровнăпа кĕрĕк арки йăваламарăмăр: сана пулăшмаллах терĕмĕр. Так штă...

Кĕçех Мульха пире хăйĕн «кабинетне» - урай çумалли çĕтĕк-çурăкпа тутăхнă витресем тытса усракан пĕчĕк пӳлĕме - ертсе кĕчĕ. Алăка шăлтăр-палтăр питĕрсе илчĕ те виçĕ ураллă тăйлăк-тайлăк пукан çине сухан пуçĕпе хытса кайнă çăкăр татăкĕ кăларса хучĕ.

- Мĕн-и, Яков Прокопча чĕнмелле марччĕ-и? - йăпăлти йыт çурилле пăхкаларĕ Павăл.

- Пур çĕре те сăмсуна ан чик, сансăрах пĕлеççĕ! - вырăна лартрĕ ăна «хуçа». - Мĕн пайламалăх пур кунта - хамăра валли те сахал! - Кĕленчери шур эрехе аллинчи стакана туптарчĕ те янк! тутарчĕ пĕр сывламасăр. - Ах, селĕм те иккен мур шĕвекĕ! Услам çу тейĕн... -Тути-çăварне вараланчăк кофта çаннипе шăлса типĕтрĕ те хĕвĕнчен лӳчĕркеннĕ хут татăкĕ кăларса мана тыттарчĕ. - Вçо в порятке! Кассăна кĕрсе укçа тӳле те - ĕçĕ те пĕтнĕ: паянах, халех тиесе кайма пултаратăн.

- Спаççипах, икĕ ĕмĕр пурăнăр, - тав турăм тем тума та пултаракан вăйлă-хăватлă техничкăна.

- Каларăм вĕт сана, Петĕр, пирĕн Ольга Христофоровна ылтăн çын тесе! - мăрăлтатрĕ юлташăм, çуллă куçĕсене тăраннă кушак аçи евĕр йăлкăштарса.

- Ытлашши ан сӳтĕл, Павăл, - çемçен асăрхаттарчĕ Мульха. - Простă, лайăх çынна пулăшас килет. - Аттук, килеççĕ кунта теприсем... Çиелтен пăхма - этемех пек, шалтан -шăна кăмпи!..

Кĕçех коридора тухрăм. «Пурах çав тĕнчере ăшă чун-чĕреллĕ çынсем, пурах!» - шутларăм «Бухгалтери» тесе çырнă алăк патнелле утнă май.