Элекçĕсем

Василий Романов | Памфлет | элек | 1 788


Хăш-пĕрисем

йăхне мансах

çынран куласшăн.

Ах,

вăл —

апла,

акку —

çапла çӳрет.

Ĕçет,

туртать,

нумай çиет,

каяннăй...

Ав, хырăмне

шампа пек

ӳстерет.

Çынпа çӳрет...

Тепри —

кунпа калаçнă.

Лешне —

пĕри чуптунă.

Питĕнчен.

Чипер Анук

упăшкипе ятлаçнă,

ĕнер çеç илтрĕм, —

тет, —

ял леш енчен.

Пĕррехинче,

ирпе,

ял хушшипе,

тĕл пулнă ик хĕрарăм.

— Итле-ха, —

тет пĕри,

Марье.

Эс мар-и вăл

манне ят янă?

Унпа калаçнă, —

теç, —

унта — кунпа...

— Эп мар, —

суять Марье, —

эс ху элекçĕ.

Сăмах саран,

Тарье.

Ман выльăхсем те,

имĕш,

чирлĕ.

Ман хĕр те,

имĕш,

сан пекех ясар.

— Эс ху асан!

Чараксăр тĕнче кинĕ!

Сан упăшку та

хăв пекех чупать!

Ĕçет?

Туртать!

Тата... Тата...

Тĕртет!

Вăл мĕн-ха...

Мĕн...

Вăл...

Вăл... Ман пата çӳрет!

— Суян! Суян!

Ман упăшкам таса!

Ăна ан тĕкĕн!

Сан хăвăн упăшку,

ав,

ман пата çӳрет!

Пăх-ха эс...

Пăх...

Унтанпала ман хырăм

кунсеренех

кăмпа пекех ӳсет!

— Ман упăшкам маттур!

Ăратлă выльăх!

Ун пек пулсан

кашнийĕнех

сатур,

тĕнче те тахçанах

тĕнĕлĕнчен тухатчĕ.

Пăх-ха хăвна

сăн питӳнте мĕн пур?!

— Юрать... Кулах...

Ман урасем çеç кукăр...

Сăн-питĕмçĕм вара

Тин пиçнĕ çимĕç пек!

Сан автану ясар!

Ман чăхсене

пăхпит,

таптать, таптать те вăрттăн

кайран,

тем ыйтнăн,

— ах, калама та намăс, —

тек хам çине пăхать...

— Тарье...

— Марье...

— Тарье...

— Марье...

— Тарье... Мана ан тĕкĕн!

Ак,

автанна

тытатăп та пусап.

Пулать яшка

сĕтеклĕ те пит сиплĕ,

качакунне те

пилĕкне хуçап!

— Марье!..

— Тарье! Тата...

Тата...

Тата татах тăсма

пулать-ха, янавар...

Анчах та эп,

кăшт кулăшла пулсан та...

Анчах та эп

Тарье те Марье мар...

Çапла,

тĕнче кулли,

чĕлхен чаракĕ.

Çын пурнăçĕ —

кашнийĕн хăйне май.

Кирек епле

ăраскала ватмашкăн,

пĕрин те аллине

çĕклесчĕ мар.

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —
Хаклав:
Шухăшĕ:
Чĕлхе илемлĕхĕ:
Содержанийĕ: