Хыçсăмах

Геннадий Юмарт | Хыçсăмах | 1 076


Вулаканăм, ман сăмахăм

Вĕçленет çак вырăнта.

Ман калавăм та юмахăм

Йăлăхтарчĕ, тен, тата.

 

Халăхра татах та пулĕ

Паттăр чун та паллă кун.

Чухăн мар чăваш кун-çулĕ,

Пин юпа, пин кукăр ун.

 

Тишкерсе пĕтереймерĕм,

Пĕлеймерĕм пĕтĕмпе.

Тĕп çула йĕрлерĕм терĕм,

Çыртăм ырă йӳтĕмпе.

 

Шарламан теме ан хăйăр,

Такмакларăм сăвăлла.

Тан тапса килсессĕн вăйăр,

Хăвăр çырăр хăвăрла.

 

Ăстарах пулсан ăс-халăр,

Шăрантарăр вичкĕнрех.

Тĕплĕреххĕн, тĕрĕс калăр,

Шухăш юхтăр çивĕчрех.

 

Каярах çырса пăхмашкăн

Çитлĕ пулĕ çĕн хыпар —

Ан ӳркен ăна пухмашкăн,

Ӳркеврен кăна хăпар.

 

Çурăлман чечек çурлайтăр

Хӳхĕммĕн илемленсе.

Çут çурта пек çуталайтăр,

Тăтăр йăлтăр хĕмленсе.

 

Вăл чăваш ятне çĕклетĕр

Чăн-чăн тивĕçлĕ çĕре.

Çакă пултăр чăн тивлетĕр,

Кун курмашкăн пил сире!

 

Пил илсен пин ылтăн тенĕ,

Лекмен чиксĕр хурлăха.

Пил сăмахĕ илтекенĕ

Курĕ кĕтнĕ ырлăха.

 

Пуç таяр — пире пиллеччĕр

Пирĕн мăн асаттесем.

Хĕн килсессĕн хӳтĕлеччĕр,

Çитчĕрех ĕмĕчĕсем.

 

Хамăр халăх та чыс куртăр

Аслă шавлă тĕнчере.

Вăл хастарлă, тивĕç пур-тăр

Хисепе кĕрекере.

Çавăн пекех пăхăр

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —
Хаклав:
Шухăшĕ:
Чĕлхе илемлĕхĕ:
Содержанийĕ: